Rahina Saraswati utawi kabaos naler Piodalan Sang Hyang Aji Saraswati sane nepek ring rahina Saniscara Umanis Wuku Watugunung sering pisan mapaiketan ring kawentenan ageman ngawacen miwah nyurat selami arahina (24 jam). Ageman punika mapaiketan ring pamargin Brata Saraswati. 

Kadiasapunika sane munggah ring artikel ilmiah mamurda “Motivasi Belajar dan Beasiswa Dewi Saraswati di tengah Perayaan Hari Saraswati” sane kasurat olih Ketut Sumadi saking Fakultas Dharma Duta IHDN Denpasar tur kapublikasiang ring Jurnal Guna Widya, Volume 3, No 1, warsa 2011. 

Ketut Sumadi nyuratang sadurung piodalan Saraswati kalaksanayang sadurunge ngalintang tengah rahina, nenten kadadosang ngawacen miwah nyurat japa mantra naler kasusastraan. 

Majeng ring sang sane ngalaksanayang Brata Saraswati jangkep malarapan antuk ngamargiang tapa brata, yoga, samadhi,. nenten kadadosang ngawacen miwah nyurat selami 24 jam. 

Rikala malajahin saluir daging kaweruhan mangda state kadasarin antuk hredaya sane henik naler unteng kahyun bhakti majeng ring Sang Hyang saraswati rumasuk ngupapira perpustakaan sane kaduwenang. Ring rahina Saraswati makasami buku, lontar utawi pustaka suci siosan kaaturin banten utawi bakti saraswati, raris kalanturang antuk puja pangrastiti majeng ring Dewi Saraswati, prabhawan Ida sane ngaripta miwah ngupapira sastra mautama. 

Piodalan miwah makasami sane mapaiketan ring brata saraswati (parindikan mautama) kalaksanayang rikala semeng utawi rikala Sang Hyang Surya kantun ring purwa, utawi mangda nenten kantos lintang tengah rahina. yening lintang ring tengah rahina, sane kaaturin puja pangastuti wantah aksara kemanten boya kawisesan Sang Hyang Aji Saraswati. 

Pangurati Budaya Bali Made Nurbawa maosang manut ring pikayunan (logika) ring rahina Saraswati kaweruhan sane anyar wawu katedunang olih Sang Pangripta. Dadosne sadurunge wenten sane mersidayang malajahin miwah tedunne kaweruhan punika mapalet-paletan manut ring pamargin galah miwah genah. 

“Rikala Saraswati kaweruhan wawu katedunang olih Sang Pangripta, dadosne sadurung wenten sane sida malajahin. Kasuksman buku miwah lontar patut kasungkemin pinaka witning kaweruhan, boya wantah fisik kemanten. Ngawacen lontar patut kapikayunin pinaka ngawacen kaweruhan” baos aji sane maduwe oka adiri punika. 

Penerjemah: Putu Ayu Candra Dewi