Galungan, Galah Nyikiang Ane Doh

Minggu, 21 Juli 2019 | 11:03 WITA

Galungan, Galah Nyikiang Ane Doh

beritabalicom/net/koleksi universitas leiden

DOWNLOAD APP BERITABALI.COM   

Beritabali.com, Denpasar. Orta nyanggra rahinan jagat Galungan subé biur uli aminggu. Sekancan masyarakat Baline, uling bapak-bapak kantoran kanti tukang suwun milu ngortaang. Yening bapak-bapak kantoran ortane sekancan ane luung-luung, ije lakar megalungan? kude lakar nguling? tur nakonang THR.
 
Sakewala, yen tukang suwun ortane metungkalikan. Pragat ngortang ajin barang e ngemaalang, uli ajin buah, busung kanti ke ajin be celenge. Ah, ento tuah orta, bisa saja, bisa sing. Ane seken-seken saja, makejang ajak demen nyanggra Galungan. Ento mawinan semeton Baline nyak tuyuh ngayahin keneh ne apang maan maturan. 
 
Dong Jineng conto ne. Dadong ane meyusa telung benang tiban ento idup pendidi, pianak ne ane luh sube kajuang, ade ane muani Made Cenik, sube merantau ke Badung. Dong Jineng nongos di teba kangin, ane keselatin tukad ajak jalan gede. Dong Jineng tusing je mampuh megarapan, dikenkene, Dong Jineng tuah ngar porosan ane kinsanange di warung. 
 
Sebilang lakar Galungan Dong Jineng setate sebet, ulian inget teken dewekne idup pedidi tur tuna. Ane ngae nyangetang sebet, panak ne ane muani tusing karwan buin pidan mulih. Dong Jineng inget panakne mulih telung Galungan ane maluan, kayang jani tusing ade mulih. 
 
"Nik, Nik, pidan cai mulih. Meme sube nawang cai sube kelih, tusing pantes meme nyap-nyap teken cai. Sakewala, Galungan sube paak, sing mekita cai mulih," sigsigan Dong Jineng di gebeh baas ne. Made Cenik, dugas e enu masekolah mule mebesen teken memene, yen sube tamat masuk. lakar megae ke Badung apang ngidang meliang memene be celeng nuju Galungan. 
 
Dugas ento, Dong Jineng tusing nyangetang. Sube tawange Made Cenik tusing je ngidang lakar ke Badung, ulian tusing ngelah montor. Sakewala keneh Made Cenik, ngedenang. Disubane aminggu tamat masekolah, Cenik lagas merantau ke Badung ulian numpang bemo. Pengakune meli siap pengina, lakar ubuh e. 
 
Neked di Badung, Cenik ane mebekel baju asetel teken pipis seket tali tuun di peken Badung. Dugas ento peken ne nedeng rame meseluk, nadak sara ade ane ngidih tulung teken cenik, ia oraine nyuwun bunga akampil ngabe ke montor gede ne. Gelisang satua enggal, Cenik di Badung dadi tukang suwun. 
 
"Galungan sube paak, jani pasti sube liu anake meblanja, dumadak je liu maan bekel. Galungan jani awake lakar mulih ke kampung, sebu telung Galungan tusing mulih ulian nambunin bekel," kaeng ne Cenik di beten bingin Peken Badung sambilange metek pipis. 
 
"Nik, suud monto metek pipis, melahang mekeber pipis caine. Buin pidan mulih," petakon Gilik, timpal e Cenik ane patuh megae dadi tukang suwun di peken Badung. "Kayang penampahanne lik, men cai buin pidan?,". "Icang buin mani Nik, apang maan mesugian jumah," keto ortane ajake dua. 
 
Gelisang satua enggal, Cenik neked di desane pagrendot. Ngabe busung, bunga, buah tur be urutan celeng. Dong Jineng mekesyab nepukin Cenik teka, tur tusing ngidang naanang yeh peningalan nepukin pianak ne mulih. "Nik, Nik, dingeh munyin memene? dugas ne, memang mekaengan di gebehe apang cai nyak mulih. Neked munyin meme ditu Nik?," petakon Dong Jineng. 
 
"Munyi meme tusing je neked kanti ke Badung me, ne ulian Galungane, inget cang mulih. Dugas maluan, cang tusing maan mulih ulian pasuhe liu me," saut Cenik. Cerita Cenik lan meme ne, sujatine wantah sesuluh idup ane mabesen wantah Dharma ane nyikiang irage sareng sami, utamane sane doh. Doh ulian tongos, doh ulian kayun, doh ulian tetujon. Punapi antuk, mangde Dharma puniki setate ajeg pinaka titi pengancan iraga nemugelang kayun sane becik. [bbn/pan besan/psk]


Minggu, 21 Juli 2019 | 11:03 WITA


TAGS: bahasa bali kenken bali



Berita Terkait :


Berita Lainnya :

Lihat Arsip Berita Lainnya: