Tegehne wilangan kasus ulah pati di Bali seken-seken dadi pawungu di makejang pihak. Di warsa 2024, suba kacatet liunne 95 kasus ulah pati ane ada di Pulau Dewata. Wilangane ene mapapadan teken 3,07 persen uli populasi tur limang palet tegehan teken rata-rata nasional. 

Nampenin paundukane buka keto, tim redaksi Beritabali.com ngembasang kanal ane mamurda “Suara Jiwa”. Kanal ene lakar pepes sabilang minggu ngamaang informasi ane mapaiketan ajak isu tur ngamaang edukasi kesehatan mental lan satua inspiratid penyintas ajak narawakya utama Prof. Dr, dr. Cokorda Bagus Jaya Lesmana, S.Ked.,Sp.K.J.(K).,MARS. Manggala Redaksi Beritabali.com, I Putu Putra Setiawan ngorahang embasne kanal ene marupa cihna uratian media ajak krisis kesehatan mental di Bali. Iye negesang kautaman media ane ngelah swadharma tur sesana dadi titi informasi tur tongos ane trepti anggon kramane ane enu mautsaha di paundukane sipeng. 

“Tiang ajak makejang tusing sida ngoyong dogen nepukin wilangan ulah patine ane sayan nincap. Uli kanal Suara Jiwa, tiang ajak makejang dot ngamaang tongos ane sida nyokong panyeger, edukasi, tur pabligbagan ane kapungkah di wawidangan kesehatan mental,” teges Putra. 

Kanal ene buin dadi sumingkin kukuh malarapan sapatekan Prof. Cokorda Bagus, psikiater budaya ane dadi besik mase Kepala Divisi Psikiatri Budaya Fakultas kedokteran Universitas Udayana. Iye katawang dadi pelopor layanan kesehatan mental ane mabasis komunitas tur budaya di indonesia uli Suryani Institute for Mental Health. 

Prof. Cokorda ngamaang panampen ane luung di kanal ene buka angin sumilir anggon nuduk panginget kolektif di krama Baline. 

“Kanal ene mautama anggon nincapang rasa inget kramane, nguangin stigma, tur mungkah tongos ane trepti anggon mabligbagan saparindikan kesehatan jiwa,” munyin oka ane nomer telu uli psikiatri Prof. Dr. dr. Luh Ketut Suryani, SpKJ (K) ene. 

Iye ngawewehin yening edukasi ane pepes kalaksanayang tuah mula mautama pesan rikala kaanggon nolih cacirenne uli simalu, ngukuhang panyeger soang-soang padewekan, tur mase akses ajak layanan profesional ane beneh. Kanal Suara Jiwa kaaptiang sida mucehang pangalimbak wilangan ulah pati tur mingetin kaluihan jihwa krama Baline makejang. 

Acupit Profil 

Dadi akademisi, Prof Cokorda Bagus Jaya Lesmana mase ngalimbakan teori proto-personality tur terapi Spiritual Hypnosis Assisted Therapy (SHAT) anggon nulungin manain trauma uli saenu di tengah belingane. 

Iye mase nabdabin tur ngutsahayang psikiatri budaya dadi program unggulan di FK Universitas Udayana tur nadian kampuse ene pusering pendidikan subspesialis di widange ento. Iye mase pepes ngalarang paiketan pangremba internasional ajak makudang-kudang universitas kasub di jagate, tur taen dadi fellow di University Of Melbourne ajak pamilet program IVLP uli Departemen Luar Negeri AS. 

Pangawi makudang-kudang buku buka Biarkan Anak Berkembang Wajar, Bincang Psikiater tur Buku Ajar Psikiatri, Prof. Cokoarda tuah anak ane visioner ane masikang empati, spiritualitas, tur budaya rikala ngutsahayang kesehatan mental ane dadi swahdrama ajak makejang.