Manggala Masyarakat Transportasi Indonesia (MTI) Wawidangan Bali, I Made Rai Ridartha, nyobyahang yening ane utama maka krananne kamacetan di Bali ane jani karasa nyasan nincap. 

Manut buka dane, ajanian ene begeh pesan panampen ane pelih ane ngorahang yening kamacetanne ulian panekan wisatawanne. 

“Ada dua panampen, anake sai ngorahang rikala macet ento nyiriang ada parikrama ane bek tur lebian, tur rikala paundukan jalane sipeng buka Covid-19 ane dugase ene ento artinne tusing ada pidabdab apa-apa,” baos dane mara-mara ene. 

Dane negesang, panekan wisatawan jatinne ngemaang pakibeh ane melah ajak ekonomi Bali, rumasuk teken sektor transportasi. Nanging, pikobete teka rikala paundukan lalu lintas ane tusing sida katerima ulian macet ane lebian. 

“Tusing kenken macet ane utama anake teka ka bali. Kenkenang jani anake sida teka ka Bali kaayahin ban utsaha transportasi tur tusing maan macet ane liu,” pawewehne. 

Rai Ridartha negesang, maka krana ane utama kamacetan di Bali ento mawit uli motor/mobil soang-soang iragane krama lokal ane ngalaksanayang swagina sadina-dina, boya uli motor/mobil wisatawan. Bedikne layanan transportasi publik ane andel dadi silih tunggil krana kramane milihin nganggon mobil/motorne soang-soang. 

“Yening tolih, data kunjungan ka Bali, pastika suba wilanganne ento boya wilangan ane nuek dadi krana kamacetan, sujatinne anake ane sai ngae macet ento, tuah anake ane ngalaksanayang swagina keto mase pesu sabilang wai lenan teken ento mobil/motor soang-soang,” tegesne. 

Manut buka dane, jani ene makudang-kudang layanan transportasi publik buka Trans Metro Dewata tur Trans Sarbagita suba majalan, nanging konden maksimal krana konden sida kanti ka sajebag wawidanganne tur konden sida ngamaang layanan ane janten di kramane. 

“Atengan kramane ane nganggo Trans Metro Dewata ene suba sida ngarasayang pikenoh uli layanane ento, lenan teken ento ada mase kramane ane konden nganggon krana makudang-kudang panampen luirne kramane ento konden kajantenang ngindikin transportasi massal uli umah ka umah nuju tongosne ane katuju malarapan suba pastika ada layanan apa tusing tur galahne buin pidan dogen,” tegesne. 

Ane dadi pamucehne, Rai Ridartha nuludang guru wisesa jagat Bali apang stata nincapang kualitas layanan transportasi publik, nyimbarang buin rutene, mastikayang tusing kasepan teken jadwal, tur ngamaang katreptian teken kramane. 

“Panepas ne ane kapertama tuah iraga ngutsahayang apang kramane sida magentos uli kendaraan pribadi ke layanan tranportasi publik, tur ane patut kategesang tuah nincapang kualitas layanan, luirne, nyimbarang konektivitas, dadinne iraga buin ngwehin rute wawidangan ane konden ada angkutan umumne, iraga tincapang buin andelne yening layanan manut teken jadwal angkutan,” munyinne. 

Lenan teken ento, fasilitas kendaraan transportasi massal mase patut luung, ma-Ac, trepti, tur jimbar apang sida kapilih ban kramane. 
“Tiang precaya pesan yening jaringan tranportasi publik ene jangkep luirne A kanti C ngaliwatin B makisid acepok sakewala patut precayain ene lakar kapilih baan kramane tur patut stata kalaksanayang eda med kategesang patut stata kabiayain, yening mareren buka dugase ene lakar keweh pesan ngidupang buin,” pawewehne.