Orta tatu buin nibenin Bali, nepek dugase rahina ane sapatutne kabekin ban kasubagian, Rahina Suci Galungan. 

Ada anak cerik ane tuuhne mara 11 tiban, IS, kabakatang suba tusing enu di durin umahne di Kecamatan Kintamani, Bangli. Panarka simalunne kadenanga iye jejeh krana kakalahin padidian di umahne kanti peteng pesan. 

Paundukane ene ngae biur makudang-kudang kramane. Adi bisa anak cerik amonto ngelah keneh ngalarang [aripolah ane ekstrem buka keto? Apake krana iye padidian, jejeh, tur sipeng ane karasayang anake cerik dalem pesan kanti makada iye ngelah keneh ngelarang ulah pati muput uripne? Bek pesan ane matakon adi bisa anak ane enu cerik, ane mara nyalanin idup, sida nyemak pajalan gede buka keto?

Di jagat psikiatri, paundukane buka kene nyihnayang ada ane tusing beneh di emosional anake cerik ane ketahne tusing sida katolih malu-malu, nanging sida makada kaon pesan yening tusing enggal katawang tur kaubadin. 

Tusing Sidane Ngeretang Keneh Tur Impulsiavitas Anake Cerik

Manut buka apa ane suba maan katureksain ban psikologi positif nampenin parindikan ulah pati, anake cerik enu ngelah wates ane alami rikala ngeretang kenehne ane tusing beneh buka jejeh, panik, keto mase marasa padidian ditengah sipeng. Rikala tusing ada panyokong emosional ane kukuh di wawidanganne, rasa jejeh ento sida ngalimbak dadi rasa kaserung ane gede kanti nyemak pajalan impulsif ane tusing beneh. 

Manut buka teori Emotion Dysregulation negesang yening uli cerik anake cerik suba tusing kabekelin kawagedan ngeretang kenehne buka, kenken caranne mucehang rasa jejeh rikala padidian dadinne iye lakar enggal pesan nyemak pajalan impulsif rikala ngarasayang pikobet. 

Buka apa ane toliha teken psikodinamika, tusing sidanne anake cerika rikala ngeretang kenehne tur impuls boya ja dadi pelihne, nanging ento marupa cihna uli panglimbak kepribadian ane enu rapuh. Buka teori klasik Sigmud Freud, parindikan padewekan ane len raosne kepribadian jadmane ento kawangun uli telung baga: Id (eredan naluriah), Ego (pangeter realitas), tur Superego (ajahan moral). 

Dugase cerik ene, Id ane dadi pangered spontan lenjokan tusing kadasarin ban tatimbang, nanging yening Ego ento mara ngalimbak adeng-adeng. Tegesne, yening anake cerik marasa jejeh, gedeg, keto mase padidian, iye konden ngelah kawagedan ane gede ngeretang kenehne ento. Emosine suba nguasen dewekne buka ombake ane gede ane tusing sida kapucehang. Paripolah impulsif, kanti tragis, sida nibenin rikala iye suba tusing ngelah daya lakar mautsaha mucehang rasa sakite ento. 

Yening mula uli simalu paiketan anake cerik ajak pangempune tusing stabil tur trepti, anake cerik lakar keweh ngawangun rasa trepti di tengah dewekne padidi. Tur rikala krisis nibenin, iye marasa tusing ngelah “sosok internal” ane dadianga tongos ngepil. Rasa jejeh dadinne gede pesan tur impuls apang sida malaib uli rasa sakite ento ane ngawinang sida matingkah ane paling ekstrem. 

Anake cerik ane marasa tusing ngelah paiketan ane raket teken reramanne ane liunan makatang pakewuh ane gede rikala mucehang stress keto masa papasahan. Pamuputne, apa ane patut kabakatang anake cerik boya ja tuah kaoyongin ban fisik dogen, nanging mase kaoyongin emosionalne mapaiketan ajak ene rasa welas asih ane gede ane sida ngaenang iye nawang yening rikala jejeh, iye tusing padidian.

Rasa Kaejohin Di Tengah Paundukan Ane Rame 

Ulah pati boya ja cihnanne iye tusing ngelah bayu, nanging ketahne sangkaning mupu uli rasa padidian ane dalem. Manut buka Interpersonal Theory of Suicide, paripolah ane tragis buka kene, boya lekad tuah sangkaning rasa jejeh keto mase kelangan daya, nanging sida nibenin sangkaning dadua paundukan emosional ane suba taen kaliwatin tur mawirasa baat yening matemu ane buka keto buin ditengah kenehne. 

Ane kapertama rasa kaejohin, rikala buka kene anake marasa tusing ngelah tongos tusing ngelah paiketan ajak nyen-nyen. Yening buka anake cerik, buka kalaina padidian di jumah rikala peteng Rahina Suci Galungan ane benehne kulawarga keto mase komunitas mabesikan bisa ngaenang iye marasa jagate tusing nerima padewekanne. 

Ane nomer dadua rasa dadi pakewuh, tegesne iye ngarasayang yening dewekne dadi pakewuh tur ngae inguh anake elen. Di keneh anake cerik, rasa ane buka kene sida metu yadian tusing macihna sangkaning tusing ada uratian keto mase kruna-kruna ane sai karasayang tusing ngelah ius ajak anake ane suba kelih-kelih. 

Nanging, makadadua rasane ene dogen konden sida nyokong paripolah ane kaon buka kene. Ada buin abaga ane siduri ane ketah dadi krana paundukan buka kene nibenin, luirne marupa rasa wanen ane prajani lakar nyakitin dewekne. Sangkaning impulsivitas ane tegeh tur tusing cacepne rikala ngaresepang apa panadinne siduri, anake cerika sida ngawetuang paripolah ane prajani tur konden sida ngaresepang apa tegesne kamatianne. Akejep dogen, rasa takut ane bes kaliwat ento sida mucehang naluri ngajegang uripne, tur paripolah tragis nibenin. 

Parindikan protektif buka rasa pangapti, panyokong sosial, tatujon idup, tur emosi positif anggon nepasin ulah pati mautama pesan kagelahang baan anake cerik. Ane ngae padalem, di tuuh ane enu cerik buka kene, parindikane ene konden sida ngalimbak paripurna uli kulawarga tur komunitas. 

Iraga ane dadi komunitas patut suba inget yening paundukan buka kene boya tuah tragedi individu dogen, nanging mase dadi cihna tatagihanne ane jimbaran utamanne ane mapaiketan ajak pendidikan emosional uli cerik. Anake cerik patut kaajahin apang sida nawang tur ngorahang yening iye sedeng marasa jejeh, inguh, gedeg keto mase sebet tur tusing kabarengin ben keneh jejeh lakar kawelang. 

Lenan teken ento, uratian ajak katreptian emosional anake cerik patut mase dadi prioritas utama, utamanne di sedek-sedekanne kulawargane repot ajak pidabdab upakara muwah sosial. Nyayagayang panamping, mastikayang anake cerik marasa trepti, keto mase ngajakin anake cerik rikala di pidabdab kulawarga sida dadi parindikan pangawit nanging mateges mautama pisan anggon nepasin paundukan buka kakene. 

Caciren Baya Tur Tata Cara Nepasin Ulah Pati Anake Cerik 

Caciren baya ane patut kayatnain: 

Pauwahan paripolah ane drastis, buka dadinne siep dogen, enggal gedeg, keto mase ngejoh uli kulawarga tur timpal-timpal. 

Munyi-munyinne ane ngindikin rasa kelangan daya ngalanturang uripne, rasa dot magedi, tur tusing makita buin idup.

Paripolah impulsif ane ngae baya tur tusing ada parindikan ane ngaranayang

Keweh sirep, ngipi aeng-aeng dogen, keto mase jejeh yen kakalahin

Reredne rasa makita ajak pidabdab ane biasanne demenina

Nincapne rasa dotne maoyongin teken rarama keto mase pangempunne

Pidabdab ane sida kaanggon nepasin : 

Gae orta ane sida ngripta rasa trepti. Dingehang keneh anake cerik eda welanga eda mase ngalantas ngamaang pajalan 

Baang rasa ane trepti. Pastikayang anake cerik nawang yening iye tusing lakar kakalahin padidian rikala ada di tengah rasa takutne 

Ajahin kawagedan emosi. Ajahin iye apang nawang, ngadanin, tur ngeret kenehne, buka jejeh, gedeg tur sebet.

Ajak anake milu di gae-gae kulawarga. Yening suba kaajak ento ane makada anake cerik marasa dadi pahan uli paundukan ane gedenan tur sida mucehin rasa padidianne. 

Alih pitulung ane profesional. Yening anake nyihnayang caciren inguh bes gede tur paripolahne ngawi baya, enggalang makonsultasi ke psikolog keto mase psikiater anak. 

Pawungu Anggon Raga Ajak Makejang 

Panyeger mental anake cerik boya ja tuah dadi amongan kulawarga dogen, nanging mase dadi amongan komunitas. Mai ngripta wawidangan ane uratian, ramah emosi, tur nyasan paek teken munyi-munyi ane cenik ane amoneanne tusing karunguang. 

Krana di bading kedek tur kalincahan anake cerik, enu mase mengkeb rasa jejeh ane tusing sida kaorahang. Abesik uratian ane cenik, abesik gelutan ane anget, abesik rarembugan ane kebekin ban welas asih sida dadi titi ngelidang padewekan ane cerik ento uli kasipengan ane ngamatiang. Munyinne anake ento patut kadingehang, satonden kasepan. 

Ngalahinne IS ngamaang tatu ane dalem, nanging mase dadi pawungu teken iraga ajak makejang yening ulah pati boya tuah parindikan depresi keto mase wisya jiwa dogen, nanging mase nuek teken rasa kaejohin, rasa tusing maguna, tur ilangne rasa jejeh ajak kapatian. 

Anake cerik, teken emosinne ane nu lengut tur konden seken kognitifne, ejoh enggalan kena ane buka kene. Iye tusing ngadotang pajalan ane gede nanging iye ngadotang adane welas asih, paiketan, tur rasa yening iye ajaka makejang maarti sabilang wai. Jalan jani pastikayang tusing ada buin anak cerik ane marasa padidian di tengah ramianne idupe jani. 

Jalan dingehang munyi-munyi ane cenik ento. Krana disipenge iye mirib ilid, pangaukne ngidih tulung ane tambis-tambis sida kadingehang. 

(Prof Dr dr Cokorda Bagus Jaya Lesmana, SpKJ(K), MARS)