Umat hindu ring Nusantara ring rahina Buda (26/10) ngalaksanayang rahina suci Pagerwesi. Ring pinanggal hindu, rahina puniki state tedun ring rahina Buda Kliwon wuku Sinta. Kruna Pagerwesi ketah pisan mapaiketan ring pagehan wesi sane danganne maartos pangemit sane pageh tur kukuh. 

“Ring paneges puniki pastika umat hindu nyungkemin rahina pagerwesi anggen ngukuhang angga malarapan antuk kaweruhan”  baos Romo Poniman, silih tunggil tokoh intelektual Hindu.

Rahina suci pagerwesi kalaksanayang, nganutin ring desa (genah) miwah kala (galah), naler patra (kawentenan) ring genah soang-soang. “Panglaksanne ketah pisan kalaksanayang ring sanggah kakubon soang-soang utawi naler pura” baosne. 

Sakemaon, rikala wenten pandemi COVID-19 dane maosang, panglaksanne becikan kalaksanayang ring sanggah kakubon. Ring rahina Pagerwesi, krama Hindu ngaturang puja pangrastiti ring Ida Sang Hyang Widhi sane maprabhawa Sang Hyang Pramesti Guru. Sang Hyang Pramesti Guru marupa pasengan Ida Bhatara Siwa. 

Ring silih tunggil lietaratur, Lontar Sundarigama, Pagerwesi sane tedun ring Budha Kliwon Shinta marupa rahina Payogan Sang Hyang Pramesti Guru sane kasarengin olih Dewata Nawa Sangga. Indike puniki masuksma yening Hyang Pramesti Guru wantah Ida sane maprabhawa pinaka guru sujati. 

Rahina Pagerwesi puniki ketah naler karumaketang pinaka rahina anggen magehin angga sarira sane ring basa Bali lian raosne magehang awak. “Malarapan antuk kaweruhan punika jadma manusa sida magehang awak utawi magehin angga mangda state mamargi ring ajahan sane becik utawi dharma” baos Poniman.  

Pagerwesi napaiketan pisan ring rahina Saraswati sane sampun mamargi ring Saniscara (4/7) lintang. Sawusan Saraswati benjanganne rahina Redite, inggih punika rahina Banyupinaruh, rikala puniki umat Hindu ngalaksanayang panyucian angga malarapan antuk malukat ring segara utawi campuhan toya. 

Rikala punika naler, katur sakancan pangapti mangda kaweruhan sida kawigunayang ring pikenoh-pikenoh sane becik tur luih. Risampune punika benjanganne, rikala rahina Soma kabaos rahina Somaribek, sane kasungkemin pinaka rahina Sang Hyang Widhi tedun mapaica waranugraha marupa pertiwi sane gemuh miwah pikolih bhuana sane sida kaanggen nitenin urip manusane. 

Selanturnyane, rahina anggara, kabaos Sabuh Mas, para janane pacang polih pala miwah pikolih sane marupa bekel utawi sangu urip, yening sida ngawigunayang kaweruhan. Rahina Pagerwesi ring rahina Buda, sida kasungkemin pinaka silih tunggil gegambelan urip sane pageh, mangda kaweruhan miwah teknologi sane manados panuntun kahuripan. (Sumber: Kumparan)