Bali Ngorahang Lakar Ada Pajak Harian Wisman, Nganutin Model Bhutan
beritabali.com/ist/Bali Ngorahang Lakar Ada Pajak Harian Wisman, Nganutin Model Bhutan
GOOGLE NEWS
BERITABALI.COM, DENPASAR.
Pemerintah Provinsi Bali Tengah ngarencanayang kebijakan ane anyar malarapan ngadaang pajak harian majeng wisatawan mancanegara (wisman).
Pidabdabe ene nganutin sistem ane suba kalaksanayang Bhutan, ane ngutamayang wisatawan berkualitas tinggi apa sida ngalimbakang pariwisata.
Kepala Aliansi Sektor Pariwisata Marjinal Bali, Wayan Puspa Negara, ngorahang yening wisman ane teka ke Bali patut ngaliwatin seleksi ane patuh buka sistem pariwisata Bhutan. Manut kadi dane, suba galahne jani Bali ngutamayang pariwisata ane makuliatas malarapan nincapang destinasi muwah sumber daya manusia ane sida nyokong sektor ene.
“Wisman patut kapilah pilihin malarapan pidabdab ane mesib care sistem ane suba kamargiang negara Bhutan” munyinne Puspa Negara.
Gubernur Bali, Wayan Koster, satondenne suba ngorahang dukunganne ajak kebijakan ene uli 2023. Iye nureksain pajak harian ene sida dadi solusi rikala pacang ngenterang arus wisatawan ane sayan nincap, lenan ken ento sida mase kaanggon nyaga palemahan miwah budaya di Bali.
Mantan Menteri Pariwisata muwah Ekonomi Kreatif, Sandiaga Uno, mase taen ngusulang konsep ane mesib buka keto apang kalaksanayang di Bali ane matetujon nincapang kualitas pariwisata. Keto mase di galah-galahe ane suba liwat ene, Senator Bali Ni Luh Djelantik mase nyokong para manggala Indonesia apang ngalaksanayang model pariwisata Bhutan ane sida kaenterang luung miwah ngalimbak.
Pinaka referensi, uli September 2022 Bhutan suba ngalaksanayang pajak harian ane liunne 100 dolar AS per wisatawan utawi Rp 1.6 juta. Pajak ento kakeniang pinaka prabea pawangunan ane ngalimbak (Biaya Pembangunan Berkelanjutan) miwah kaanggon nyokong konservasi palemahan ajak panglimbak infrastruktur wisata ane ramah lingkungan.
Bali ane kakeniang malarapan kaluihan palemahanne, pasih ane eksotis, ajak warisan budaya ane sugih, nyatet kunjungan 6,3 juta wisatawan mancanegara awarsa ane suba liwat. Wilanganne ene suba ngalintangin rekor kunjungan satondene pandemi. Warsane jani, Bali nargetang sapatekan wisatawan mawilangan 6,5 juta wisman, apemargi ajak strategi pemerintah rikala nincapang kualitas pariwisata.
Dugas Oktober ane suba liwat, Bali mase kaadegang pinaka pulau ane paling luung di Asia olih pembaca CN Traveler di Penghargaan Pilihan Pembaca. Kalaksanayangne pajak harian ene kaaptiang sida nyokong pengelolaan pariwisata ane sayan ngalimbak tur nyaga daya tarik Pulau Dewata majeng ring wisatawan ane ngelah kualitas tegeh (sumber: cnnindonesia.com)
Editor: Putu Ayu Candra Dewi
Reporter: bbn/net
Iklan Sponsor
Iklan Sponsor
Iklan Sponsor
Iklan Sponsor
Iklan Sponsor
Iklan Sponsor
Iklan Sponsor
Iklan Sponsor
Iklan Sponsor
