Gubernur Bali Wayan Koster resmi nyobyahang Surat Edaran Nomor 07 Tahun 2025 ane muatang paundukan tatanan anyar katujuang ajak wisatawan asing rikala ada di Bali dugase Soma (24/3/2025) di Rumah Jabatan, Jaya Sabha, Denpasar. 

Di edaranne ento, ada makudang-kudang pawungu ane patut kalaksanayang ajak wisatawane anggon nyaga kasucian tur kalestarian budaya Bali. 

Di Surat Edaran ene, wisatawan asing tusing kabaang ngalaksanayang parilaksana ane karasayang sida ngusak nilai budaya tur palemahann di Bali. Luirne pawungune ane utama ento katetepang buka kakene: 

1. Macelep di wawidangan suci tusing ada tatujon mabhakti

Wisatawan tusing kabaang macelep di Utamaning Mandala tur Madyaning Mandala genah suci buka pura tur palinggih sajaba ada paundukan lakar mabhakti malarapan anggon busana adat Bali tur suci (tusing menstruasi yening ane luh). 

2. Maparilaksana tusing anut (sopan) di tongos-tongos ane suci. 

Makejang parilaksana ane sida nyemerin tongos-tongos ane suci tusing kabaang, rumasuk menekin wangunan suci, mapoto nganggo baju ane tusing anut tur sopan keto mase yen tusing nganggo busana di pura tur tongos ane katengetang. 

3. Menekin punyan kayu ane katengetang

Makudang-kudang punyan kayu di Bali ngelah nilai spiritual ane tegeh tur tusing dadi kapenekin baan wisatawane. 

4. Ngutang laluu ngawagin

Wisatawan tusing kabaang ngawagin ngutang laluu utamanne di danu, tukad, campuhan, pasih tur tongos umum ane lenan. 

5. Nganggon plastik ane sida kaanggon acepok

Pawigunan kantong plastik, styrofoam, sedotan plastik ajak minuman kemasan plastik tusing kabaang, tatujonne nyaga karesikan palemahane. 

6. Maparilaksana ane kasar tur agresif ajak aparat tur krama lokal 

Mamunyi ane kasar, ngae uyut, tur maparilaksana agresif ajak aparat, krama lokal, ajak sesamen wisatawan, marep-arepan wiadin uli media sosial, tusing kabaang pesan. 

7. Ngelaksanayang pidabdab bisnis tusing maan izin

Wisatawan tusing kabaang magae keto mase ngalarang pidabdab bisnis di Bali yening tusing ada dokumen resmi ane kapesuang baan instansi berwenang. 

8. Milu di pidabdab ilegal

Sabilang pidabdab ilegal buka perdagangan flora tur fauna ane kapiara, artefak budaya, kahanan sakral, tur ngadep meli kahanan ilegal rumasuk narkotika, tusing kabaang pesan. 

Sanksi Ane Katujuang Baan Pelanggar 

Yen ada wisatawan ane nepasin awig-awig ene, pemerintah Bali lakar ngamaang sanksi tegas manut buka peraturan ane kalaksanayang di Indonesia. Silih tunggil sanksine ane lakar kaabaang luirne nyabut layanan daya tarik wisata ane katujuang ajak wisatawan asing ane konden mayah pungutan wisata di website https://lovebali.baliprov.go.id/. 

Lenan teken ento, Satpol PP tur Kepolisian Daerah Bali lakar ngalaksanayang pengawasan ketat tur tindakan hukum ajak pelanggar. Krama mase kaidih apang milu bareng ngelaporang pelanggaran ane kagae baan wisatawan uli Whatssapp Siaga di nomor 081-287-590-999

Pidabdab Tegas Anggon Nindihin Kalestarian Bali 

Malarapan katerbitangne Surat Edaran ene, Gubernur Bali ngaptiang wisatawan ane teka ke Bali ngaresepang tur nyungkemin adat, budaya, tur kearifan lokal ane suba dadi caciren Pulau Dewata. Pemerintah negesang yening Bali stata kapungkah buat wisatawan, nanging malarapan awig-awig ane patut kalaksanayang apang sida trepti ajak makejang.