Makudang-kudang baliho panulakan eksekusi ulian kasus Insiden Nyeoi 2023 kapasang di Desa Sumberklampok, Kecamatan Gerokgak, Buleleng. 

Kramane nu stata nulakin pangrencana Kejaksaan Negeri (Kejari) Buleleng ane lakar ngeksekusi dadua terpidana Acmat Saini (52) ajak Mokhamad Rasada (57) di paigum pengadilan kasus penodaan agama dugase Nyepi 2023 ane suba liwat. 

Panulakan uli kramane ene kacihnayang ban pamasangan baliho ane gede pesan mailehan di desane. Pemasangan baliho ento kauratiang ada di makudang-kudang tongos, luirne jalan nuju Pura Segara Rupek muwah di makudang tongos di wawidangan masjid desa. 

Baliho ane kapasang misi makudang-kudang lengkara ane nyihnayang paripolah kramane ditu. Bilih-bilihne misi ngunggahang adan tambis-tambis makejang tokoh ane ada ditu apang tusing kalaksanayang eksekusi apang sida ngupapira harmonisasi ane suba kajaga di Desa Sumberklampok. 

Makudang-kudang pihak ane ade nanda tanganin panulakan eksekusine ento, luirne Prebekel Sumberklampok, Kelian Desa Adat Sumberklampok, Ta’mir Masjid Ainul Yaqin Sumberklampok, LPM Sumberklampok, Perangkat Desa Sumberklampok, Kelian Banjar Dinas awawidangan Desa Sumberklampok, para pelopor muwah tokoh-tokoh krama ane lintas agama di desane ento. 

Satondenne ento, Kejari Buleleng suba ngamaang panggilan ane kaping telu ajak dadua terpidana kasus penodaan agama dugase Nyepi 2023. Yadian di paigum pengadilanne tusing ada kaorahang ada penahanan ajak Acmat Saini muwah Mokhamad Rasad, Kejaksaan Negeri Buleleng nu ngukuhin pangrencanane ngalaksanayang eksekusi. 

Di tengah surat ane matanggal 21 Februari 2025, Kejari Buleleng ane kaangganin Kepala Seksi Tindak Pidana Umum I Gede Eka Sumahendra nagih apang maka dadua terpidana teka ke Kejari Buleleng krana lakar kaeksekusi dugas Waraspati (27/02/2025). Nanging, kanti wates galah ane suba kabaang, maka dadua ento tusing ade ane teka. 

Kepala Seksi Intelijen Kejari Buleleng, I Dewa Gede Baskara Aryasa, negesang yening kejaksaan suba ngukuhin lakar ngalaksanayang paigum kaputusan pengadilan yadian nyungkemin panulakan uli krama. 

“Yening tusing teka, tiang ajak makejang dini lakar maksa ngalih kemu, lenan teken ento mase lakar mautsaha ngalaksanayang upaya paksa,” teges Gede Baskara, redite (2/3/2025).  

Yadian keto, iye mase mapangapti apang makadadua terpidana inget teka ke Kejaksaan tur nyalanin eksekusi. “Ban ingetne padidi iye teka ento buin luungan” pawewehne. 

Satondenne, Kuasa hukum Acmat Saini ajak Mokhamad rasad, Agus Samijaya uli Tim Advokasi Untuk Keadilan, ngorahang yening pihakne konden narima salinan putusan Mahkamah Agung (MA) RI mapaiketan ajak putusan kasasi uli Pengadilan negeri (PN) Singaraja. 

Manut buka Agus Samijaya, pihakne konden nawang dasar muwah ape dogen tatimbang kasasine katulak. Indike ene dadi acuan anggon ngawangun memori rikala proses peninjauan kembali (PK) salanturne.