13 Tali Pecalang Bali Deklarasi Nepasin Preman Masalin Rupa Ormas
beritabali/ist/13 Tali Pecalang Bali Deklarasi Nepasin Preman Masalin Rupa Ormas
GOOGLE NEWS
BERITABALI.COM, DENPASAR.
Wilanganne telu las tali pecalang uli siu lumang atus Desa Adat sajebag Bali, igum tur ngalarang deklarasin nepasin panekan preman ane masalin rupa ormas.
Deklarasine ento kasobyahang di parikrama Gelar Agung Pecalang, ane tongosne di lapangan puputan Margarana, Niti Mandala Denpasar, Saniscara (17/5).
Manggala MDA ane mase Bendesa Agung provinsi Bali, ida Penglingsir Agung Putra Sukahet negesang yening pecalang Bali dadi kori kapertama nyaga adat, budaya, tradisi tur tatamian jagat Bali.
Baca juga:
Rikala Sipenge Metu Tatu: Refleksi Psikiatri Mapaiketan Ajak Kasus Ulah Pati Anak Cerik Di Bangli
“Pecalang Bali dugase enu leluhure suba nyaga Bali, nindihin gumi Bali. Pecalang Bali nepasin kriminalisme, premanisme tur paripolah anarkis ane kalaksanayang ban preman mabaju ormas tur masilur rupa ormas,” baos Ida Penglingsir Agung Putra Sukahet.
Di deklarasine ento, ada tatelu parindikan mautama ane kasobyahang, luirne, kapertama, nepasin panekan ormas ane nyilur rupa nyaga katreptian, tur sosial, ajak paripolah premanisme, bangras, tur ngintimidasi krama.
Ane nomer dua, marengin TNI/Polri rikala ngalaksanayang katreptian di Bali, tur mucehang ormas ane ngalaksanayang paripola kriminalisme muwah premanisme.
Ane nomer telu, nyokong sistem katreptian ane terpadu mabasis desa adat (Sipandu Beradat) tur Bantuan Keamanan Desa Adat (Bankamda) rikala nyaga wawidangan desa adat tur nindihin gumi Bali.
Ida Penglingsir Agung Putra Sukahey rikala sambramawacananne maosang yening pidabdab ene matatujon matuhang pamineh nampenin isu ormas ane sayan ngalimbak di Bali.
Deklarasi ene marupa panampen malarapan paundukan premanisme ane masilur rupa ormas ane jani suba ngalimbak. Dane mase negesang, uli pidan desa adat di Bali suba ngelah pecalang ane dadi sistem keamanan tradisional, tur masikian teken TNI muwah Polri rikala ngupapira katreptian di sakancan parikrama adat tur sosial.
Dane ngawehin yening pihakne suba mautsaha makoordinasi ajak guru wisesa provinsi mapaiketan teken kasubagian pecalang, rumasuk mase paundukan insentif. Pangaptinne, guru wisesa daerah jani sida ngamaang uratian ane lebian ajak eksistensi pecalang ane dadi pangemit adat tur budaya Bali.
Editor: Putu Ayu Candra Dewi
Reporter: Humas Bali
Iklan Sponsor