Ulah pati ane kalaksanayang olih anggota Polisi ane magae di Propam Polda Bali, tur ngelah inisial Aipda AES.

Anak muani ane demen macanda ene mati tragis suud makecog uli duur jembatan Tukad Bangkung, Desa Pelaga, Petang, Badung, dugas Redite 16 Maret 2025 sawatara jam 10.00 WITA. 

Unduke ene tawanga sasubane kramane ditu curiga nolih ada mobil Suzuki Spalsh ane parkir uli semengan di jembatan Tukad Bangkung. Nanging kramane tusing nolih ada sopirne tur ane ngelahang mobil mawarna barak ento. 

Kramane lantas nureksain. Sasubane kaalih, lantas bakatanga ada anak ane suba nyelegadag di dasar jurang ane paling tegeh di Pulau Dewata ene. Unduke ene kalaporang ke Polsek Petang. Uli apa ane bakatanga sasubane kapariksa di tengah mobile ento lantas bakatanga identitas korban ane marupa pahan uli anggota Propam Polda Bali, Aipda AES. 

“Identitasne anggota Propam Polda Bali. Di tengah mobil kabakatang mase surat ane katujuang ajak kurenan, pianak tur kulawargane”, munyin sumber, dugas Redite 16 Maret 2025. 

Surat wasiat ene katujuang buat kurenane ane isinne buka kakene, “Istriku tersayang AI, Aku sayang banget sama Mama. Maafkan atas kesalahan, Bapak hanya perjuangkan keadilan. Jaga anak dan kuatkan mental anak-anak”, kakutip uli surat ento. 

Anake muani ane sasai kaukina “Ajik” ene mase nyurat ngidih pelih ajak reramanne apang nyaya dewek tur kesehatan. Iye mabesen ajak adinne TD apang nulungin nyaga panak-panake apanb buin pidan sida dadi anak ane sukses tur maan mase iye ngidih pelih. 

“Sampai bertemu kembali apabila kita bersama-sama menjadi Buddha. Doakan agar saya cepat lahir lagi,” munyinne Aipda AES nguntatin surat wasiatne. 

Sasubane kaselehin, petugas kepolisian tur instansi ane mapaiketan ngenggalang lantas ngevakuasi sawa Aipda AES ke rumah sakit. Kulawarganne ngenah sebet pesan krana anake muani ane dedemenanne macanda ento jani suba ngalain. 

Kanti jani enu dadi patakon apa ane ngaranayang ulah pati ento kajalanin baan Aipda AES ane maan magae di Humas Polda Bali ento. Ada ane ngorahang ulian pikobet di tongos magae, ada mase ane ngorahang ulian faktor ekonomi kanti ulian kulawarga. 

Yadiapin buka keto, satondene iye mati, Aipda AES mase maan video call ajak timpal-timpalne di Polres Badung. Orataanne sawates rarembugan biasa tur tusing ada ane karasa tusing beneh. 

Lenan teken ento, Kapolsek Petang AKP I Nyoman Arnaya menehang unduke ene. “Tiang ajak makejang nyelehin unduk korban mula saja marupa anggota Polda Bali apa tusing,” munyinne ke anak media. 

Catetan Redaksi : 

Hidup dimasa-masanne mula ngidaang ngae anake paling tur ngenehin ngalih jalan ane enggal ngelarang ulah pati. Nanging iraga mase patut percaya yening lakar ada jalan ane luungan teken tuah mati. 

Yening semeton keto mase anak ane tawang buin mani sedek ngarasayang pakewuh tur suba tambis-tambis nagih ngalarang ulah pati, jeg enggalin ngalih P3B (Pusat Pelayanan Pencegahan Bunuh Diri) Keluarga Compassion.

Telp: 082335555644, XL: 081999162555, IND: 08587536536