Polda Bali Sayaga Mucehang Premanisme Ormas, Ngae Tim Khusus
beritabali/ist/Polda Bali Sayaga Mucehang Premanisme Ormas, Ngae Tim Khusus
GOOGLE NEWS
BERITABALI.COM, DENPASAR.
Polda Bali ajak jajaranne negesang katelebanne rikala marengin program Presiden RI ane lakar mucehang aksi premanisme ane kabarengin baan anggota organisasu masyarakat (Ormas). Unduke ene kaorahang baan Kabid Humas Polda Bali, Kombes Pol Ariasandy S.I.K., dugase Soma (17/3/2025).
Polri lakar ngae tim khusus ane kabarengin ajak Mabes Polri, Polda Bali, tur Polres jajaran ane lakar nulungin sabilang laporan mapaiketan ajak aksi premanisme ane ngadug-adug sektor investasi. Premanisme ane kaorahang ento luirne pemerasan, pungli, panguasen lahan ilegal ajak parilaksana intimidasi ane lenan.
“Yen ada kramane ane makatang aksi premanisme buka keto, tiang ajak makejang ngaptiang kramane nyak ngalaporang uli hotline 110 tur dadi mase teka ke Polda Bali. Polri lakar nyaga katreptian tur kasingitan ane ngelaporan”, munyin Kombes Pol Ariasandy.
Sabilang laporan ane macelep lakar kalanturang baan penyelidikan tur penegakan hukum ajak anggota Ormas ane mula suba mabukti ngalaksanayang premanisme.
Tusing ja tuah ngukum kelompok preman, jajaran Propam Polri mase lakar ngalaksanayang pengawasan internal ajak anggota kepolisian apang tusing milu di praktik pembekingan premanisme.
“Yen ada personel ane mabukti milu aksi premanisme keto mase mekingin silih tunggil kelompok, Propam lakar nindak tegas malarapan ngamaang sanksi etik kanti pemecatan uli anggota Polri”, tegesne.
Lenan teken penindakan, Polda Bali mase lakar ngintensifang sosialisasi ajak makejang lapisan kramane. Polri lakar makoordinasi ajak tokoh kramane, tokoh agama, pelaku usaha, UMKM, tur instansi pemerintah ajak stakeholder ane ngelah pakilitan ajak pamucehan premanisme di widang hukum Polda Bali.
“Tiang ajak makejang uli Polda Bali tur jajaran ngajakib makejang lapisan kramane, mai johang Bali uli aksi premanisme anggota Ormas tur kaduratmakan ane lenan, dadinne paundukan Kamtibmas di Bali lakar ajeg, trepti, tur kondusif”, pawewehne.
Editor: Putu Ayu Candra Dewi
Reporter: bbn/spy
Iklan Sponsor
Iklan Sponsor
