Penyelidikan miwah penyidikan sane kalaksanayang Sat reskrim Polres Buleleng majeng ring sawa sane kapolihang ring Dusun Buyan,Desa Pancasari, Kecamatan Sukasada, Buleleng utawi nepekne ring Hutan Lindung Desa pancasari ring margi Singaraja Denpasar sampun jenar. 

Lampusne silih tunggil krama saking Gianyar sane kacatet pinaka krama Kota Bekasi, Jawa barat, I Pande Gede Putra (53) kapastikayang pinaka korban pembunuhan. 

Indike punika naler kapikukuhin antuk pikolih autopsi saking dokter forensik RSUD Buleleng rumasuk naler makudang-kudang kasujatian fakta miwah data sane sampun sida kapikolihang personel Sat Reskrim Polres Buleleng sane kaenter olih Kasat Reskrim Polres Buleleng, AKP I Gusti Nyoman Jaya Widura.

Gatra rung Mapolres Buleleng nyobyahang, polisi sampun ngidentifikasi tatiga pelaku sane ngawinang korban Pande Gede Putra kantos lampus. 

“Wenten tatiga anak istri sane sampun sida kajuk miwah kantun kalaksanayang pinariksa sane intensif ring sane kapikayunin wenten kasus pembunuhan”, sasobyahan saking sumber ring Mapolres Buleleng. 

Kantun saking gatra ring Mapolres Buleleng sane nyobyahang, sewusan kapikolihang sawa miwah pikolih pinariksa, Kasat Reskrim AKP Jaya Widura ngararis ngalaksanayang gelar perkara sane kaanggen mastikayang kawentenan tindak pidana, napi malih selanturnyane kapikukuhin sareng pikolih autopsi kantos sida kapastikayang.

“Sane pastika Goak Poleng kaping ajeng sampun sida ngejuk kakalih anak istri sane kapikayunin wenten paiketannyane  ring korban ring Denpasar. Raris kalanturang malih, kapikolihang wenten malih asiki sane kajuk. Sane mangkin kantun katangkep: baos saking sumber ring Mapolres Buleleng.

Kapikolihangnyane wenten dugaan pembunuhan sane kapikayunin kalaksanayang olih tatiga anak istri punika mawit saking parindikan sane kacurigain wenten ring sawa korban. Rumasuk nenten kapolihangne bukti-bukti petunjuk ring genah sawa punika kajantenang rikala nyangket ring abing ring ssin margi Singaraja Denpasar punika. Kantos ngararis rikala kalaksanayang pinariksa kapertama prarai korban kajantenang sebuh miwah irung naler cangkemne benyah. 

Kasi Humas Polres Buleleng, AKP Gede darma Diatmika, Buda (12/2/2025) rikala kapastikayang durung sida ngicen baos sane pastika, riantukan kantun mautsaha malih mastikayang ngeninin indik kawentenan dugaan pembunuhan puniki

“Jantos, kantun kapastikayang malih miwah kantun kapinariksain saksi-saksi: baos Darma Diatmika” 

Sadurung, sawa sane nenten maduwe identitas miwah naler kajantenang lanang punika kapikolihang malinggeb miwah nyangket ring abing ring margi Singaraja Denpasar, Dusun Buyan, Desa Pancasari, Kecamatan Sukasada, Buleleng. Kajantenangne sawa punika ngararis ngawi biur krama sane ngawigunayang margi irika, Soma (3/2/2025) ring sawatara jam 14.00 Wita.

Sawa punika pertama kajantenang olih Nengah Luyada (45) krama Dusun Wirabuana, Desa Gitgit. Rikala punika, Luyada pacang ngicen tedan bojog sane wenten irika, sakemaon rikala punika, makudang-kudang bojoge masuryak keras pisan kantos ngawi Nengah Luyada marasa wenten sane nenten patut.