Bulan Februari marupa bulan sane kajantos-jantosang olih sakancan krama sane kalulut asih ring sajebag jagate duaning pacang makelingin hari kasih sayang utawi sane ketah kapireng Hari Valentine. 

Ring Indonesia, hari Valentine kapikelingin majeng ring sami pajangkepan sane kalulut asih malarapan antuk saling ngicen hadiah, ngajeng rikala wengi sane romantis utawi wantah nyobyahang unteng kayun asihne ring sane katresnain. 

Hari Valentine puniki naler kapikelingin majeng ring krama Hindu ngawit saking riin, sakemaon kantun makeh kramane sane durung uning, inggih punika Tumpek Klurut utawi sane ketah kauningin inggih punika rahinan Tumpek Klurut. 

Tumpek Klurut marupa upakara pangrastiti/yadnya sane kapikelingin pinaka rasa pangayubagia majeng ring Ida Sang Hyang Widhi Wasa sane maprabhawa Sang Hyang Iswara duaning sampun ngardi suara-suara suci / tetabuhan malarapan ring kaluihan miwah seni. Dadosne rahina Tumpek Klurut marupa cihna saking tresna asih majeng ring piranti seni marupa gamelan. Krama Hindu ketah pisan maosang Odalan Gong utawi Otonan Gong. 

Yening kapikayunin malih, rahina Tumpek Klurut sujatinne pinaka sarana witning rasa saling asah, asih, miwah asuh ring sesamen pada miwah sakancan sane kakardi olih Ida malarapan antuk seni gamelan/tetabuhan. 

Rahina Tumpek Klurut wantah silih tunggil wangun implementasi saking tri Hita Karana sane maduwe artos tatiga sane sida ngawinang jagate manggung kasubagian sane mawit saking kasukertan tatiga paiketan, silih tunggilne paiketan imanusa majeng ring Ida, paiketan imanusa majeng ring palemahan, miwah paiketan imanusa majeng ring sesamen pada. 

Rahina tumpek klurut ngelingang iraga malih mangda state saling tresnain, state naler saling nyinggihang miwah ngupapira kasukertan ring sesamen pakardin Ida, napi malih ring masa pandemi kadi puniki. Siosan ring saling ngwehin kado miwah dinner romantis sareng sane katresnain, mikelingin Valentine warsane mangkin naler sida kalaksanayang malarapan antuk makuda-kudang pamargi majeng ring sang sane ngarsaang state sareng-sareng. Pidabdabe puniki sida kalksanayang malarapan antuk ngwehin sembako, ajengan gratis utawi sane tiosan.

Dadosne hari kasih sayang boya ja wantah katujuang majeng ring sang sane katresnain kemanten, utawi kulawarga naler sawitra kanti, nanging naler sida katujuang majeng ring krama akeh ring wawidangan iraga. Duaning nyobyahang rasa welas asih majeng ring sesamen pada pacang ngawinang iraga saling magehin miwah saling ngremba ring masa pandemi kadi puniki.