Pemuda Bali Bersatu (PBB) nyasan ngukuhang eksistensinne malarapan ngadegang kepengurusan di Provinsi Lampung dina Anggara (25/2/2025). 

Pelantikanne ene mingetin ekspansi organisasi ane suba majujuk uli 2002 ene ke dura Bali muwah dadi pamargi kapertama ane ngukuhang solidaritas ajak swadharma pemuda Bali di sajebag wawidangan. 

Made Muliawan Arya ane sai kakaukin De Gadjah pinaka Ketua Dewan Pembina Pengurus Pusat PBB, negesang yening Lampung marupa provinsi ane kapertama di dura Bali ane ngalaksanayang pelantikan uli kawangunne dugase 2 tiban ane suba liwat.  

“Ane simalu di dura Bali kawangun wantah Lampung, nggih tiang mikukuhin yening Lampung ane simalu mare ane lenan, jani Lampung asasih ane lakar teka DKI tiang lakar malincer kayange ento”, munyinne. 

Manut buka De Gadjah, pelantikanne ene maan kawangdeang ulian dinamika politik buka Pilpres, Pileg muwah Pilkada. Nanging, jani organisasi suba sayaga ngalimbak ke 12 provinsi ane lenan. 

Malarapan pradigma anyar, De Gadjah ngarepang PBB sida dadi inspirasi di widang generasi mudane muwah tusing buin katolih pinaka organisasi ane kaon. 

“Pabesen tiange apang pratisentanane, generasi muda Bali ane ada di Lampung patut sida nincapang panglimbak dewek apang sida masaih di era ane nyasan ngalimbak miwah global. Dadinne kapungkur wekas sida maguna anggon di dewek padidi, kulawarga, muwah wawidangan tongos iraga” munyinne. 

Riwekas, PBB pacang state ngalimbakang pakibehne ke makudang-kudang provinsi, silih tunggilne; DKI Jakarta, Jawa Barat, Jawa Timur, Sulawesi Utara, Sulawesi Tengah, Sulawesi Barat, Sulawesi Tenggara, Sumatera Selatan, Banten, Kalimantan Tengah, Kalimantan Timur, muwah NUsa Tenggara Barat (NTB). 

De Gadjah mase negesang yening PBB boya ja organisasi ane masaih ajak kelompok ane lenan, nanging ada anggon nakekang solidaritas muwah semangat kebersamaan di tongose merantau. 

“Organisasi PBB boya ja lakar masaing ngajak organisasi ane lenan, sakewala ene anggon masikian ngajak organisasi lenan di widang sosial, suka duka, paguyuban sesamen semeton Bali apang sida saling asah asih asih mawiguna di wawidangan dija tongosne maenjekan ditu langite kasuun maguna anggon Lampung muwah negara” tegesne. 

“Riwekas titiang sareng sami tusing ja ada paiketanne ke politik. Tiang simalunne ada inspirasi dugase di Amerika dawege ditu makejang krama Indonesiane solid tur kompak, ngelah tiang pangapti daweg 2015 ngelah organisasi ane tongosne di dura provinsi ane lenan ento sida kapanggung 2-3 tiban ane suba liwat, tiang ngorta ngajak nyamane ane di Lampung suba lantas keto dadi ben” munyinne Ketua DPD Gerindra Bali ento. 

Organisasi ane ngelah bek anggota di Bali pacang stata ngalimbak di makudang-kudang wawidangan. Malarapan keneh egar angabar-abar masikian di PBB, De Gadjah dot nyihnayang yening lenan teken kaluihan pulau Bali, kramanne mase sida kakeniang ramah, luih, miwah sida ngawangun sinergi ngajak makudang-kudang suku di Indonesia. 

Lenan teken ento, Ketua PBB Provinsi Lampung ane mara kalantik, I gusti Putu Yuggo Arta, ngorahang yening kawentenan PBB di Lampung matetujon nyaga miwah ngawerdiang nilai-nilai luhur budaya Bali. 

Lenan teken ento, organisasi ene mase mikukuhin lakar bareng kontribusi di pawangunan daerah malarapan masinergi bareng-bareng ngajak pemerintah muwah makejang kramane. Gubernur Lampung Rahmat Mirzani Djasual mase pinaka dewan pembina PBB. 

“Titiang sareng sami sayaga lakar ngamilunin sinergi malarapan makejang elemen lembaga inggian ento lembaga keumatan, legislatif keto mase eksekutif. Lenan teken ento, tiang mase edot marengin kontriobusi di makudang-kudang baga, sekadi pendidikan, ekonomi, sosial muwah budaya” teges Yuggo Arta. 

Pelantikan ene mase katekain baan Asisten Bidang Pemerintahan Gubernur Lampung, M. Firsada, Ketua DPRD Provinsi Lampung Ahmad Giri Akbar, anggota DPRDLampung I Made Surajaya, ajak Ketua PHDI Lampung Dr. I Nyoman Setiawan. 

Lenan teken ento Ketua Umum PBB Komang Gede Juliantara tusing ngidaang teka. Sapetekan tokoh-tokoh ene nyihnayang dukunganne teken kawentenan PBB muwah swadharma PBB di krama Lampung.