Made Muliawan Arya, ane sai kasambat De Gadjah, buin kapracayain ngenter Persatuan Tinju Amatir Indonesia (Pertina) Bali periode 2025-2029. 

Makejang pangemong Pertina uli sia kabupaten/kota di Bali briuk sapanggul teka nyokong De Gadjah apang sida ngalanturang kamanggalaanne. Wakil Ketua Harian I PP Pertina, Brigjen (Purn) Edison Simanjuntak, mase milu teka di parikramane ento tur ngapresiasi pajalan Musprov ane suba majalan antar tur kondusif. 

Sasubane kapilih, De Gadjah nyambatang rasa suksmanne teken makejang pangemong ane suba ngamaang buin kapracayaan ajak iye. 

“Tiang tusing ja maambisi, nanging tiang demen pesan ajak olahragane ene. Tiang ngapresiasi pesan teken dukungan makejang pangemong kabupaten/kota ane suba ngamaang kapracayaan tiang apanga buin ngamanggalanin Pertina Bali periode ane kaping dua ne,” munyine Ketua DPD Gerindra Bali ento. 

Yadian maan makeneh mareren ajebos sasubanne iye bareng di kontestasi politik, De Gadjah lantas narima mandas ento krana bes demenne ajak jagat tinju. Ia nureksain yening enu bek ane sida kautsahayang anggon nincapang prestasi atlet tinju Bali. 

“Di keneh tiange, suud tur fokus ajak kulawarga malu. Nanging di Musprov jani makejang buka 9 kabupaten/kota nu mase ngedotang tiang. Tiang nyungkemin pesan panyokong makejang,” pawewehne. 

Sasubane-kapilih, De Gadjah ngalantas nabdabin ngae kepenurusan ane anyar. Ia lakar ngenggalang ngawangun tim formatur ane lakar kaserahang ke KONI Bali satondene kaajuang ke PP Pertina apang sida maan Surat Keputusan (SK) ajak jadwal pelantikan. 

“Mapaiketan ajak kepengurusan di Pertina Bali, lakar enggal kapragatang. Nah, suba saptutne enggal makoordinasi ajak KONI Bali tur ke PP Pertina. Sasubane maan SK, ngalantas kalantik,” tegesne. 

Lenan teken ento, Brigjen (Purn) Edison Simanjuntak ngaptiang kamanggalaan De Gadjah sida ngaba Pertina Bali nincap tur ngalimbak tur sida ngalekadang atlet ane maprestasi. 

“Nah tiang ngapresiasi duaning suba buin kapilih De Gadjah. Madak ja apang manian sida ngaba Pertina Bali nyasan luung,” munyinne. 

Pertina Pusat mase negesang kautaman pamikukuh pembinaan atlet apang Bali stata ngembasang petinju ane sida masaing di tingkat nasional kanti internasional. 

“Bali suba luung atlet tinjunne, ngawit uli Popnas, Kejurnas tur PON. Ento marupa pamucuk uli level nasional. Madak ene stata sida katincapang riwekas,” panguntatne.