Kasus prostitusi online jaringan internasional ane kabarengin baan krama dura negara (WNA) uli Rusia jani suba nincap paletanne. 

Anastasiia Koveziuk (26) tur Maxsim Tokarev (31), ane kasangkain dadi mucikari tur operator bisnis prostitusi lintas negara ene, suba resmi nyalanin persidangan di Pengadilan Negeri Denpasar, Bali. 

Sidang ane kapertama kalaksanayang dugase, Waraspati, 17 April 2025, malarapan ban pengamanan ane ketat. makadadua terdakwa ene nganggo rompi tahanan Kejaksaan Negeri Badung tur mautsaha nekepin muanne rikala pesu uli ruang sidang. 

Anastasiia tur Maxsim kena dakwa ngalaksanayang parilaksana ane tusing anut mapaiketan ajak perdagangan manusia, tur eksploitasi seksual komersial. Jaksa Penuntut Umum ngorahang telung lapis dakwaan ajak makadadua terdakwane ene. Luirne ngenen Pasal 2 Ayat (1) UU No. 21 Tahun 2007 saparindikan Pemberantasan Tindak Pidana Perdagangan Orang (TPPO) jo Pasal 55 Ayat (1) KUHP. 

Keto mase Pasal 4 Ayat (2) jo Pasal 30 UU No. 44 Tahun 2008 saparindikan Pornografi jo Pasal 55 Ayat (1) KUHP. Ane paling siduri kena Pasal 506 KUHP saparindikan Mucikari ane len raosne Germo jo Pasal 55 Ayat (1) KUHP. 

Manut uli apa ane bakatanga uli panyelehane, Anastasiia Koveziuk maan amongan ngamanggalanin sindikat keto mase ane ngelahang rekening transaksi paridananne. Ia ngelah amongan milihin tur ngisinin nomor WhatsApp ane magae dadi PSK di situs ane kalolane, ane sida kaakses global. 

Maxism Tokarev, dadi lima tengawan Anastassia, nyalanang operasional dadi admin di situs prostitusi. Ia ane nyautin anake ane meli ento tur ngelola yening ada ane mesen layanan seksual di wawidangan Bali. 

Kasuse ene sida kabakatang sasubane pihak Kepolisian Sektor Badung nerima laporan pidabdab ane kacurigain tusing beneh di silih tunggil hotel di Jalan Pantai Berawa, Canggu, Kuta Utara. Dugase Sukra, 10 Januari 2025 sawatara jam 03.22 WITA, petugase ditu makatang ada anak muani Rusian ane mainisial AD sedek magencetan ajak anak luh ane sapantaran ajak iye, ane mainisial EE. 

Manut buka satuanne, EE ngaku karekrut baan sindikat ento uli 29 Desember 2024. Ia iklananga uli “situs dewasa” ane misi katalog video tur foto anak luh WNA, tur maan pipis layanan kanti 300-500 dolar AS sabilang sesinne. EE satondenne taen mase nyalanin gae buka kaketo di Thailand, tur lantas makisid ke Bali, tongosne Anastasiia nyediaang akomodasi ane baange iye. 

Sasubane maan bukti, polisi sida ngajuk Anastasiia tur Maxsim di silih tunggil villa ane luung di Banjar Anyar Kelod, Kuta Utara. Ule panyelehne kabakatang, yening panekan bisnis ane tusing beneh ene kapah dadi buka kene, 50% baanga PSK; 40% baanga Anastasiia ane ngelahang tur ane ngalola jaringan; tur 10% baanga Maxsim ane dadi manajer operasional.