Ngadeg Gubernur Bali 2025-2030 Wayan koster pacang mikukuhin pawigunan aksara Bali ring sajebag segmen ring Bali. Aksara Bali ring widang konvensional miwah digital pacang kaanggen ring wawidangan pemerintah, swasta, sekolah miwah pidabdab sane mabantang budaya ring desa-desa se Bali. 

Majeng ring lembaga utawi perusahaan swasta sane nenten trepti nganggen aksara Bali pacang kakeniang danda sane mageng.

Dande marupa kacabutne izin usaha miwah report yening perusahaan puniki nenten ngamargiang standar regulasi ring Bali. 

“Titiang sampun midabdabin mangda tancap gas ring pamikukuh pawigunan aksara Bali inggian punika ring widang konvensional miwah digital, mangda sida mamargi gelis” 

“Benjangan yening wenten perusahaan sane nenten trepti pastika izin usahanne pacang kacabut. Miwah pacang kakeniang report perusahaan sane nenten becik,” teges Gubernur Koster, ring pamargin Bulan Bahasa Bali Bali VII Warsa 2025 ring Art Center Denpasar, Saniscara 15 Februari 2025. 

Anggota DPR RI tigang periode (2004-2009) puniki maosang, siosan ring punika pawigunan keyboard aksara Bali ring widang digital naler pacang kapikukuhin. Lembaga-lembaga pemerintah miwah swasta pacang kapatutang ngawigunayang punika. 

Sami produk lokal Bali naler patut nganggen aksara Bali. Yening nenten madaging aksara Bali pacang nenten kapromosiang. Dane naler nganggen conto sekadi sane kalaksanayang ring produk lokal arak Bali. 

“Sami produk arak mangkin patut nganggen aksara Bali, miwah sane nenten ngawigunayang aksara Bali nenten pacang kapromosiang. Puniki wawu produk arak Bali. Titiang sareng sami naler pacang matutang ngawigunayang aksara Bali kadi puniki ring sami produk lokal Bali,” baos dane. 

Koster naler susatya pacang ngamargiang aksara Bali ring wawidangan sekolah olih para sisya sane wenten ring sekolah naler ring jaban sekolah.

“Yening mersidayang ring sekolah miwah jaba sekolah sekadi balai masyarakat, banjar wenten parikrama mawirama, masolah, magambel, mapuisi aksara Bali miwah sane tiosan. Punika marupa dasar iraga ring desa puniki mangda sami mautsaha ngupapira miwah ngawerdiang pakibeh  Bali,” baos dane.

Majeng ring Gubernur Bali kalih periode wit saking Desa Sembiran puniki, Pulau Bali pacang ical jati angga budayane yening pratisentana jagat durung mikukuhin ngamargiang aksara bali. 

Malarapan antuk punika, kasusastya Gubernur Koster nenten malih kamarmaaang. Selamin uripne pacang kasuksrahang anggen ngupapira miwah ngawerdiang panglimbak tetamian Bali. Samipun macihna ngawit saking dane ngenterang Bali ring periode kapertama. 

Daweg punika sangkaning ngupapira miwah ngawerdiang aksara Bali, Koster ngembasang Peraturan Gubernur Bali Nomor 80 Tahun 2028 indik Perlindungan dan Penggunaan Bahasa, Aksara dan Sastra Bali miwah Penyelenggaraan Bulan Bahasa Bali. 

“Yening nenten sangkaning punika Bali pacang ical jati anggane. Pratisentana maduwe swadharma ngawarisin aksara Bali pinaka warisan sane luhur saking leluhure,” baosne.