Dadua Bule Tembaka Di Vila Badung, Ngalahin Abesik
bbn/ilustrasi/Dadua Bule Tembaka Di Vila Badung, Ngalahin Abesik
GOOGLE NEWS
BERITABALI.COM, BADUNG.
Paripolah mamati-mati tan pa asih di CA vila di wawidangan Badung, dugase Saniscara 14 Juni 2025 sawatara jam 00.20 ngedas lemah.
Dugase ento, dadua bule uli Australia magetih-getih sasubane kakenen senjata api baan pelaku ane tusing kena bane uli dije witne.
Las pesan, ulian paundukane ento ngaenang adiri korbanne mati, luirne Zipan R (32), tur buin abesik nu sekarat madan Sanar G (35). Makadadua enggalanga palaibanga ke RSUP Prof Ngoerah, Sanglah, Denpasar.
Paundukan panembakane ento enggal pesan tur dramatis. Pelaku ane kasangkain lebihan ken adiri, nadak sara teka tur macelep ke tengah villa ane tongosina teken dadua bule Australia. Pelaku ngaba sanjat tur nadak saja nembak makadadua korban di kamar vila.
“Pelaku narejak macelep ke tengah vila tur nembak makadadua korban di tengah vila,” orta uli sumber.
Uli paundukane ento, maka dadua bulene magetih-getih di tengah kamar sasubane kakenen ban sanjata api. Sasubane nembak korban, pelaku malaib.
Sumber ngorahang dugase ento korban Zivan R (32) mati di TKP. Sawane Zivan R suba kaevakuasi ke RSUP Prof Ngoerah, Sanglah, krana lakar maautopsi.
Lenan teken ento Sanar G (35) sekarat tur maenggal-enggalan lakar operasi apang sida mesuang liunne peluru ane enu ada di awakne.
“Korban ane sekarat di rumah sakit enu kaubadin baan medis,” ortane uli sumber buin.
Paundukane magetih-getih ene kaselehin ajak jajaran Polres Badung tur kabarengin baan Polda Bali. Polisi enu mase ngalaksanayang panyelehan ane tatujonne sida anggona makatang nyen pelakune tur apa motif paripolah mamati-mati ento kalaksanayang.
Kabid Humas Polda Bali Kombespol Ariasandy SIK ane kakonfirmasi matutang paundukane panembakane ento. Dane ngorahang yening kasuse ene lakar enggal kasobyahang baan Polres Badung.
“Mula saja ada panembakan, sasobyahanne jalan antiang uli Polres Badung,” teges dane, Saniscara, 14 Juni 2025.
Editor: Putu Ayu Candra Dewi
Reporter: bbn/spy